„Hosesack-Check!“
 
Jede Morge s’gliiche Prozedere!
Chuum us de Fädere, duschet u aagleit, schteisch unger der Türe u……

Markus? Hesch aus derbi??......Check!!

Vore linggs, hinge linggs, hinge rächts u vore rächts!?
Outoschlüssu, Portmonnee, Huusschlüssu u Nastüechli!
Haut! s’Handy fählt! D Brille ou!
Zrugg is Huus u no mau vo vore ! Vore linggs, etc…….!

U das jede Morge, immer wieder. Und wehe, ig vergisse öppis. Der Tag isch gloffe!
 
Mittlerwile het sich das zunere Routine, eigete Rhytmik, ja sogar zumene Groove entwicklet.
Mau verschlafe, mau hektisch, mau lasziv (chunnt uf e Tag a), mau tolpatschig, mau gnärvt,
mau verschpielt, aber immer unger der Tür.
 
E so wie ne morgentliche Tanz vor der Hustür, soz’säge ne Quickstep, oder Tango oder Flamenco.
Gseht mängisch ou us wie ne abgänderete, abverheite Schuehplättler
oder wie vo Salsa mit Gipsbei inschpiriert.
Zum guete Glück gseht mi niemer!!!
 
Aber ebe, es isch zur tägliche Routine worde und ig zelebriere das.
Chli schpeziell wird’s de aube, we mir i’Ferie gö!
Dihr weit sicher nid wüsse, wele Tanzmarathon ig denn düremache?!
Biudli göht wäg!!!
 
Schön, sit Dir bi üs u heit e Guete
 
Mit liebe Gruess
Roli, Markus u Mitarbeiter