Meier's Löwen Berken
CH-3376 Berken
Tel. 062 963 17 44
Fax 062 963 02 84
Mo und Di geschlossen
info@loewenberken.ch





Die Gastgeber

Die Räumlichkeiten

Die Küche

Der Keller

Die Umgebung














Home
Aktuell
Öffnungszeiten
Anfahrtsweg
Stellen & Lernende
Medien
Impressionen
Kontakt





Im Winterschlaf vom
 21.12.20-22.01.21

>> Mehr Infos

Mir sueche...
Restaurantfachfrou/Mann

>> Mehr Infos

Läbe mit Corona!
Mir hei e Bitt!

>> Mehr Infos







E Winterschlaf für e Löie

Eigetlich geit ja der Bär i dere Zit i Winterschlaf u nid der Löi.

Aber das Jahr isch aues angers u der Löie muess zwungenermasse i Winterschlaf bis mindestens am 22. Jänner 2021.

Und ob de dä Winterschlaf am 23. Jänner fertig pfuuset isch, schteit o no i de Schtärne.
Jä, de haut! Näh mir das Nückerli u tröime vo bessere Zite, läbe vo de Resärve u wache im Früehlig mit eme Riesehunger nach Gescht uf. Nid zum frässe sondern zum Verwöhne.
I däm Sinn wünsche mir Öich aune e gueti Zit u tröimet ou e chli. Vo Ferie am Schtrand, vo exotische Wälte u lockerer Schtimmig.
Das hilft! ;-) 

Roland u Markus samt Löie-Team

PS: Mir möchte üs ganz ganz härzlich bi Öich aune für die berüehrendi Ungerstützig i Form vo Restaurantbsüech bi Öich bedanke!
Das het üs mächtig Iidruck gmacht, wie Dir zu üs haltet.


 
 



Mir dörfe üses Team ergänze mit ere/eme

Restaurantfachfrou/Mann ab sofort oder uf Vereinbarung

Der Schtellebeschrieb gseht folgendermasse us:
Mitarbeit i üsem pflegte Spiisservice mit eigener Station oder bi Bankettisätz , Mise-en-place-Härrichtig und Mithilf bir Lehrligsusbildig u bir Ufrächterhaltig vo de aktuelle Hygienerichtlinie, mit Wuchenänddienscht

Derzue bringsch Du mit....

en abgschlossni Lehr als Restaurantfachfrou/Mann oder ebebürdigi Bruefskenntnis, Teamfähigkeit u Belastbarkeit, Bereitschaft am Wuchenänd z’schaffe u vorauem viu Fröid am Betröie vo üsne gschätzte Gescht imene lockere, gfröite  Arbeitsumfäld.

Di erwartet bi üs....

e spannendi, abwächsligsriichi Ufgab imene läbhafte Betrieb, es familiärs Arbeitsklima mit eme ufgschtellte, motivierte Team, es nid alltäglichs Agebot i Sache Wy u Chuchi, wo chaisch de Gescht empfähle, e tolli, langjährigi Gaschtig vom Büezer bis zum Diräkter, gregleti Freizit (Sunntig Aabe, Mäntig u Zischtig) u Ferie (6 Wuche)

Hoffentlich hei mir Di jetz e chli gluschtig gmacht, damit Du Di bi üs mit ere Bewärbig mäldisch,
entweder per Mail, Telefon oder per Poscht.

Mir fröie üs, Di dörfe lehre z’kenne!

Roland Steiner, Markus Meier samt Löie-Team

Restaurant Löwen, 3376 Berken, 062 963 17 44, info@loewenberken.ch, www.loewenberken.ch
 
 



Fürs Läbe mit Corona hei mir es paar Aaliege!


Es beschtimmt eifach für ne witeri Zit lang üses Läbe, das cheibe Corona! Ob mir jetz wei oder nid!

Drum wäre mir froh, we Dir uf es paar Sache chönntit Rücksicht näh, damit mir die Aforderige vo Bund u Kanton chöi erfülle, für Öich und üs gnüegend chöi Acht gäh, und Öich es glungnigs Erläbnis bi üs im Löie chöi biete.

Tüet doch bitte

- unbedingt telefonisch oder per Mail reserviere 
- mit vollständiger Adrässe, Telefon u Geburtsdatum 
einisch pro Partei
- warte vor em Igang, bis Dir platziert wärdit 
- am Igang und uf der Toilette d'Häng desinfiziere
und üs mitteile, we Dir Öich nid wou füehlit!
- 1,5 bis 2 Meter Abstand halte
-
uf üser schriftliche u mündliche Aawisige u Markierige achte 
- üs nid verurteile, we mir Öiches Wunschdatum nümm chöi anäh, wiu mir z'weni Tische hei
- üs nid übu näh, we mir nid jede Wunsch chöi erfülle

u gniesset mit üs stattdesse, dass mir für Öich dörfe da si.

Mir fröie üs so sehr, dass mir dörfe schaffe und Öich dörfe bi üs z'Gascht z'ha!!!

Mit vorwiehnächtliche Grüess us Berken

Roli u Markus samt Team

 



 Uf em Perron
 
" Halloooo! Hoi! He, Du? Fäbu!? Guguus?". So het's chürzlich näbe mir am Morge früeh uf em Bahnschteig tönt.

Mir, no immer am Verwache, i eim vo dene sältene Fäll, wo'n'ig mit em Zug ungerwägs bi, fahrt das Gschrei fei schreg i und ig wott grad e Sauve vou losloh, do seit mis unbekannte Näbedra: "Dä ghört nüt, het d'Schtöpsle i de Ohre!", luegt uf en anger Bahnschteig übere, wo'när eine kennt, nimmt sis Handy füre, töggelet druf ume u kener 10 Sekunde schpäter zuckt dä Ohreschtöpseltyp uf em anger Perron zäme, nimmt ebefaus sis Handy i d'Hang, töggelet ou druuf los u wo bi mim Näbedra s'Handy suuret, luegt är uf u winkt mim Näbedra erfröit zue.

Aber NEI! Är antwortet nid! ----- Chunnt ou nid uf ne zue!-----

Är nimmt wieder sis Handy u töggelet ir Ping-Pong-Manier mit Grinse u Schmunzle, mit Ougebrauezieh u Handmimik, der Blick geng uf's Handy grichtet mit mim Näbedra, bis der Zug chunnt. Bim Ischtiige seit mis Näbedra erfröit zu mir: "Das het mi jetz gfröit, ihn wieder einisch z'gseh!" u verwungeret sich e chli über mis verdutzte Gsicht, wo'n'ig, vom Momänt überrumplet, ha gmacht.
Während der Fahrt han ig de en Idee gha, wo mi het lo schmunzle. We Dihr ab jetz zu üs chömit, wei mir de ou Öichi Handynummere. De chönnt ig de nämlich am Schluss vom Aabe diräkt us der Chuchi e Gruppechat starte zum Nochefroge, ob Dihr zfriede sit. Gsuch sicher no guet us, wenn aui Handy im Restaurant mitenang würde lüte u es kollektivs Töggele dür's Huus gieng, oder?

Aber zersch mau e Guete mitenang u heit e schöni Vorwiehnachtszit

Markus Meier