Meier's Löwen Berken
CH-3376 Berken
Tel. 062 963 17 44
Fax 062 963 02 84
Mo und Di geschlossen
info@loewenberken.ch





Die Gastgeber

Die Räumlichkeiten

Die Küche

Der Keller

Die Umgebung














Home
Aktuell
Öffnungszeiten
Anfahrtsweg
Stellen & Lernende
Medien
Impressionen
Kontakt





üsi Wildcharte
bis am 14. Novämber 21
 

>> Mehr Infos

Freie Lehrstellen
Koch u Restaurantfachfrau/Mann
 

>> Mehr Infos

DAS si no richtigi
Oberaargouer

>> Mehr Infos







Üsi Wildcharte

biete mir Öich bis am 14. Novämber a.
Natürlich mit de Klassiker Rehpfäffer, Rehrahmschnitzeli, Rehrügge und ou üse Nässler us Berken darf nid fähle.
Derzue hei mir ou Waldpiuz, Hirsch, Fasan, Wiudsou, verschiedeni Herbschtfrücht wie Öpfu, Bire, Hagebutte,
Schlehdorn und was weiss nid no aus.

U villech längt's ou wieder ab Ändi Oktober für e

wiissi Trüffel us em Piemont

dä de natürlich mit üsne huusgmachte Nüdeli u viel Schabernack mit em Markus bim Drüberhoble,
wiu jede wott jo ne chlini Äxtraportion ergattere ;-)   

Mir fröie üs uf jede Fau uf Öich u wünsche scho jetz

E Guete mitenang

Roland Steiner, Markus Meier u s'ganze Team



Danke viu,viu mau

für Öichi zahlriiche liebe u gschätzte Bsüech, liebi Gescht,
mit dene Ihr üs i de letschte paar Wuche erfröit heit.
Es tuet wahnsinnig guet, wieder für Öich do z’si und Öich z’Gascht z’ha.
Mir luege vorwärts u gäh aues, damit mir Öich e gueti  Zit bi üs im Löie chöi biete.
Genauso wie früecher. 
Was jetz aber nöi isch, sie die extremen Erwartige u Wünsch,
wo im Momänt bündlet vo de Gescht uf üs aberägne und mängemässig zuenäh.
Het’s mit der Hitz z’tüe , mit Corona-Müedigkeit, mit beidem oder si mir alli z’dünnhütig:
mir wüsse’s nid. Drum sände mir hie jetz e chline

Hilferuef!!!

Löht üs doch bitte üs sälber lo si! Mir si sehr gärn für Öich do........
……aber mit üsem Agebot, üsem Konzept und mit üsere Art vo Gaschtfründschaft.


Es isch üs nid müglich, allne alles rächt z’mache u tüen üs immer schwärer dermit, wie vehemänt me vo üs verlangt,
üs z’verändere oder az’passe und es als Enttüschig und Beaschtandig überebringt,
wemes nid nach ihrne Wünsch umsetzt.

Zum Bischpil si mir de einte z’tüür, den andere aber wieder z’priiswärt(!?)
oder z’wenig kreativ  z’weni modern.Den einte wiederum si mir z’fründlich(!?) u den andere z’ufründlich,
mau hei mir es z’höchs Niveau u mau wieder es z’töifs Niveau.
De suecht me bi üs öppis, wo eigetlich i Etablissements mit rote Fänschterränder ghörti
(Nenei, es si nid d’Manne!) oder me probiert üs z’nouggle (das heisst inelegge uf Bärndütsch),
damit me als Gascht günschtiger fahrt(profitiert).
Me forderet üs diräkt uf, Coronamassnahme z’missachte  (ohni Maske, Häng schüttle u nid so blöd z’tue!) u das mit em Regischtriere schiint für teu Lüt schier es unmöglichs Ding z'si.  


U s’Schlimmschte isch: me erwartet, dass mir das alles schtillschwiigend häre näh u akzeptiere.
Wehre oder rächtfertige mir üs, isch es grad mit eme uf die eigeti Mühli verdräite Bricht im Internet uffindbar.

U wenn haut das vo üs Gebotene nid de Bedürfnis entspricht, de muess me das amene angere Ort go sueche.
Wiu mir chöi u wei üs nid ändere. Mir hei ir momentane Zit gnue angeri Herusforderige z’meischtere.

Drum fröie mir üs über jede Gascht, wo zu üs chunnt u das konsumiert, wo mir mit Härzbluet abiete.

U das si zum Glück sehr sehr vieli. Merci viu, viu mau nomau a dere Schtell!

Mit liebe Grüess

Roland Steiner, Markus Meier u s'ganze Team



Liebi Lehrstelle-Suechendi

für's 2022 hei mir i de Bruefe

Choch/Chöchin EFZ

u

Restaurantfachfrou/Ma EFZ


jewile no e Lehrstell frei, wo mir gärn ere ufgschtellte, teamorientierte u fröhliche Person wette gäh,
wo ruehig o chli verschmouset u verschläcket darf si u chli Egge u Kante het.
Houptsach, sie het s'Gfüehl für's Gaschtgwärb, für's feine Choche u für's Verwöhne vom Gascht.

Bisch Du so ne Person? JA?
De fröie mir üs uf Dini Bewärbig oder Dis Telefon, damit mir Di chöi lehre kenne
u mir Dir üse Betrieb samt allne Mitarbeiter chöi zeige.

Bis gli mit eme liebe Gruess

Roland Steiner, Markus Meier u s'ganze Team 

Gasthof Löwen
3376 Berken
062 963 17 44
info@loewenberken.ch



Täuer umdräie!
 
 
Früecher het me gseit, en Oberaargouer erchennsch ir Beiz sofort,
nämlich wenn er d’Täuer umdräit u luegt, ob’s Langenthaler Porzellan sigi.

Ja, das isch mir chürzlich i Sinn cho, und ig dräie üsi Löietäuer, die aute mit em Peugeot-Löi,
ou mau um u stuune nid schlächt: Jahreszahl 1960.

I däm Jahr 1960 hei miner Eltere der Löie übernoh und das Gschirr kouft.
Dä Täuer chönnt sicher Gschichtli verzeue,
het nach über 60 Jahr kes Näggi  u ke Lack ab.
 
Dür wie mängi Hang isch dä scho gange?
Wie mänge Löffu het äch dert drin gschtocheret?
Wie mängisch isch er scho gfingerlet worde?
Oder mit em Finger usputzt?
Wie mängi Zunge het drin desume gschläcket, obwou me nid sött?
Wie mängisch isch är äch abgwäsche worde? Desume gfloge u fasch a Bode gheit?
Umdräit u derbi der Räscht usgschüttet worde?
Was het dä aus am Tisch mit übercho?
Drame, Strit, Liebesgesöisel, Ching wo d’Suppe nid wei ässe, etcetera!
 
Aber eis isch sicher! Dä Täuer us em 60gi isch no nid i d’Brüch gange ,
isch ganz bliibe u fröit sich umso meh, Öich mit feine Gricht der Hunger z’schtille.
 
E Guete (und ersch Täuer dräie, we Dir fertig sit, bitte ??)
  
Markus Meier, Roland Steiner
u Mitarbeiter


Fürs Läbe mit Corona hei mir es paar Aaliege!

Es beschtimmt eifach für ne witeri Zit lang üses Läbe, das cheibe Corona! Ob mir jetz wei oder nid!

Drum wäre mir froh, we Dir uf es paar Sache chönntit Rücksicht näh,
damit mir die Aforderige vo Bund u Kanton chöi erfülle, für Öich und üs gnüegend chöi Acht gäh,
und Öich es glungnigs Erläbnis bi üs im Löie chöi biete.

Tüet doch bitte:

- unbedingt telefonisch oder per Mail reserviere 
- warte vor em Igang, bis Dir platziert wärdit 
- am Igang und uf der Toilette d'Häng desinfiziere
und üs mitteile, we Dir Öich nid wou füehlit!
- 1,5 bis 2 Meter Abstand halte
- d'Maske numme am Tisch abnäh u süsch immer träge
- Öich einzeln mit em Handy am Tisch mit em QR-Code registriere
-
uf üser schriftliche u mündliche Aawisige u Markierige achte 
- üs nid verurteile, we mir Öiches Wunschdatum nümm chöi anäh, wiu mir z'weni Tische hei
- üs nid übu näh, we mir nid jede Wunsch chöi erfülle

u gniesset mit üs stattdesse, dass mir wieder für Öich dörfe da si.

Mir fröie üs so sehr, dass mir wieder dörfe schaffe und Öich dörfe bi üs z'Gascht z'ha!!!

Mit vorsummerliche Grüess us Berken

Roli u Markus samt Team

 



Cha me verschtah, muess me aber nid!!!

"Die ganzi Situation isch ja so eifach u klar verständlich! Jetz tüet doch nid eso! Die z'Bärn wüsse scho, was sie mache!"
Das hei mir jetz o scho es paar Mau ghört, we mer üs e chli skeptisch güsseret hei.

Auso: SO EIFACH ISCH ES:
- uf der Terrasse dusse isch Maskepflicht für alli, we me nid grad isst oder trinkt! SO WIT SO GUET!
- der Hotelgascht aber cha ohni Maske dinne ässe! OKAY?
- Der Büezer u der Chauffeur, wo sich i de Büezerbeize agmulde hei, dörfe ou dinne ohni Maske am Tisch si. AHA!?!
- Mir dörfe üser Rüüm für 15 Persone vermiete mit ere schriftliche Veribarig! SUPER!
- Mir dörfe ou Catering mache COOL!!!
-..... aber nid im eigete Betrieb!!! Für üser Rüüm müesse mir e externe Catering-Betrieb afroge. LOGISCH!???!

Wie gseit: CHA ME VERSCHTAH; MUESS ME ABER NID!

Es chunnt mir eso wie nes Computerschpieli vor, wo me immer wieder nöii, komplizierteri Levels cha erreiche.
U was het me am Schluss dervo?
Me het Zit verschpielt.
Und isch der Realität entflohe!
Aber isch das würklich vergliichbar?
Mir gloube nid!
Das isch alles nümm zielfüehrend u e Flicketeppich worde.
Wei mau luege, weles Level si als Nöchschts in ihrem Corona-GAME ufschalte/ ifüehre wärde.



Roland Steiner, Markus Meier us ganze Löie-Team

   

 

 




 
 



 Uf em Perron
 
" Halloooo! Hoi! He, Du? Fäbu!? Guguus?". So het's chürzlich näbe mir am Morge früeh uf em Bahnschteig tönt.

Mir, no immer am Verwache, i eim vo dene sältene Fäll, wo'n'ig mit em Zug ungerwägs bi, fahrt das Gschrei fei schreg i und ig wott grad e Sauve vou losloh, do seit mis unbekannte Näbedra: "Dä ghört nüt, het d'Schtöpsle i de Ohre!", luegt uf en anger Bahnschteig übere, wo'när eine kennt, nimmt sis Handy füre, töggelet druf ume u kener 10 Sekunde schpäter zuckt dä Ohreschtöpseltyp uf em anger Perron zäme, nimmt ebefaus sis Handy i d'Hang, töggelet ou druuf los u wo bi mim Näbedra s'Handy suuret, luegt är uf u winkt mim Näbedra erfröit zue.

Aber NEI! Är antwortet nid! ----- Chunnt ou nid uf ne zue!-----

Är nimmt wieder sis Handy u töggelet ir Ping-Pong-Manier mit Grinse u Schmunzle, mit Ougebrauezieh u Handmimik, der Blick geng uf's Handy grichtet mit mim Näbedra, bis der Zug chunnt. Bim Ischtiige seit mis Näbedra erfröit zu mir: "Das het mi jetz gfröit, ihn wieder einisch z'gseh!" u verwungeret sich e chli über mis verdutzte Gsicht, wo'n'ig, vom Momänt überrumplet, ha gmacht.
Während der Fahrt han ig de en Idee gha, wo mi het lo schmunzle. We Dihr ab jetz zu üs chömit, wei mir de ou Öichi Handynummere. De chönnt ig de nämlich am Schluss vom Aabe diräkt us der Chuchi e Gruppechat starte zum Nochefroge, ob Dihr zfriede sit. Gsuch sicher no guet us, wenn aui Handy im Restaurant mitenang würde lüte u es kollektivs Töggele dür's Huus gieng, oder?

Aber zersch mau e Guete mitenang u heit e schöni Vorwiehnachtszit

Markus Meier